כי תישא

ל,יא וַיְדַבֵּר יְהוָה, אֶל-מֹשֶׁה לֵּאמֹר.	וּמַלֵּיל יְיָ, עִם מֹשֶׁה לְמֵימַר.
ל,יב כִּי תִשָּׂא אֶת-רֹאשׁ בְּנֵי-יִשְׂרָאֵל, לִפְקֻדֵיהֶם, וְנָתְנוּ אִישׁ כֹּפֶר נַפְשׁוֹ לַיהוָה, בִּפְקֹד אֹתָם; וְלֹא-יִהְיֶה בָהֶם נֶגֶף, בִּפְקֹד אֹתָם.	אֲרֵי תְּקַבֵּיל יָת חֻשְׁבַּן בְּנֵי יִשְׂרָאֵל, לְמִנְיָנֵיהוֹן, וְיִתְּנוּן גְּבַר פֻּרְקַן נַפְשֵׁיהּ קֳדָם יְיָ, כַּד תִּמְנֵי יָתְהוֹן; וְלָא יְהֵי בְּהוֹן מוֹתָא, כַּד תִּמְנֵי יָתְהוֹן.
ל,יג זֶה יִתְּנוּ, כָּל-הָעֹבֵר עַל-הַפְּקֻדִים--מַחֲצִית הַשֶּׁקֶל, בְּשֶׁקֶל הַקֹּדֶשׁ:  עֶשְׂרִים גֵּרָה, הַשֶּׁקֶל--מַחֲצִית הַשֶּׁקֶל, תְּרוּמָה לַיהוָה.	דֵּין יִתְּנוּן, כָּל דְּעָבַר עַל מִנְיָנַיָּא--פַּלְגוּת סִלְעָא, בְּסִלְעֵי קֻדְשָׁא:  עַסְרִין מָעִין, סִלְעָא--פַּלְגוּת סִלְעָא, אַפְרָשׁוּתָא קֳדָם יְיָ.
ל,יד כֹּל, הָעֹבֵר עַל-הַפְּקֻדִים, מִבֶּן עֶשְׂרִים שָׁנָה, וָמָעְלָה--יִתֵּן, תְּרוּמַת יְהוָה.	כֹּל, דְּעָבַר עַל מִנְיָנַיָּא, מִבַּר עַסְרִין שְׁנִין, וּלְעֵילָא--יִתֵּין, אַפְרָשׁוּתָא קֳדָם יְיָ.
ל,טו הֶעָשִׁיר לֹא-יַרְבֶּה, וְהַדַּל לֹא יַמְעִיט, מִמַּחֲצִית, הַשָּׁקֶל--לָתֵת אֶת-תְּרוּמַת יְהוָה, לְכַפֵּר עַל-נַפְשֹׁתֵיכֶם.	דְּעַתִּיר לָא יַסְגֵּי, וּדְמִסְכֵּין לָא יַזְעַר, מִפַּלְגוּת, סִלְעָא--לְמִתַּן יָת אַפְרָשׁוּתָא קֳדָם יְיָ, לְכַפָּרָא עַל נַפְשָׁתְכוֹן.
ל,טז וְלָקַחְתָּ אֶת-כֶּסֶף הַכִּפֻּרִים, מֵאֵת בְּנֵי יִשְׂרָאֵל, וְנָתַתָּ אֹתוֹ, עַל-עֲבֹדַת אֹהֶל מוֹעֵד; וְהָיָה לִבְנֵי יִשְׂרָאֵל לְזִכָּרוֹן לִפְנֵי יְהוָה, לְכַפֵּר עַל-נַפְשֹׁתֵיכֶם.  {פ}	וְתִסַּב יָת כְּסַף כִּפּוּרַיָּא, מִן בְּנֵי יִשְׂרָאֵל, וְתִתֵּין יָתֵיהּ, עַל פֻּלְחַן מַשְׁכַּן זִמְנָא; וִיהֵי לִבְנֵי יִשְׂרָאֵל לְדֻכְרָנָא קֳדָם יְיָ, לְכַפָּרָא עַל נַפְשָׁתְכוֹן.  {פ}
ל,יז וַיְדַבֵּר יְהוָה, אֶל-מֹשֶׁה לֵּאמֹר.	וּמַלֵּיל יְיָ, עִם מֹשֶׁה לְמֵימַר.
ל,יח וְעָשִׂיתָ כִּיּוֹר נְחֹשֶׁת, וְכַנּוֹ נְחֹשֶׁת--לְרָחְצָה; וְנָתַתָּ אֹתוֹ, בֵּין-אֹהֶל מוֹעֵד וּבֵין הַמִּזְבֵּחַ, וְנָתַתָּ שָׁמָּה, מָיִם.	וְתַעֲבֵיד כִּיּוֹרָא דִּנְחָשָׁא, וּבְסִיסֵיהּ דִּנְחָשָׁא--לְקִדּוּשׁ; וְתִתֵּין יָתֵיהּ, בֵּין מַשְׁכַּן זִמְנָא וּבֵין מַדְבְּחָא, וְתִתֵּין תַּמָּן, מַיָּא.
ל,יט וְרָחֲצוּ אַהֲרֹן וּבָנָיו, מִמֶּנּוּ, אֶת-יְדֵיהֶם, וְאֶת-רַגְלֵיהֶם.	וִיקַדְּשׁוּן אַהֲרוֹן וּבְנוֹהִי, מִנֵּיהּ, יָת יְדֵיהוֹן, וְיָת רַגְלֵיהוֹן.
ל,כ בְּבֹאָם אֶל-אֹהֶל מוֹעֵד, יִרְחֲצוּ-מַיִם--וְלֹא יָמֻתוּ; אוֹ בְגִשְׁתָּם אֶל-הַמִּזְבֵּחַ לְשָׁרֵת, לְהַקְטִיר אִשֶּׁה לַיהוָה.	בְּמֵיעַלְהוֹן לְמַשְׁכַּן זִמְנָא, יְקַדְּשׁוּן מַיָּא--וְלָא יְמוּתוּן; אוֹ בְּמִקְרַבְהוֹן לְמַדְבְּחָא לְשַׁמָּשָׁא, לְאַסָּקָא קֻרְבָּנָא קֳדָם יְיָ.
ל,כא וְרָחֲצוּ יְדֵיהֶם וְרַגְלֵיהֶם, וְלֹא יָמֻתוּ; וְהָיְתָה לָהֶם חָק-עוֹלָם לוֹ וּלְזַרְעוֹ, לְדֹרֹתָם.  {פ}	וִיקַדְּשׁוּן יְדֵיהוֹן וְרַגְלֵיהוֹן, וְלָא יְמוּתוּן; וּתְהֵי לְהוֹן קְיָם עָלַם לֵיהּ וְלִבְנוֹהִי, לְדָרֵיהוֹן.  {פ}
ל,כב וַיְדַבֵּר יְהוָה, אֶל-מֹשֶׁה לֵּאמֹר.	וּמַלֵּיל יְיָ, עִם מֹשֶׁה לְמֵימַר.
ל,כג וְאַתָּה קַח-לְךָ, בְּשָׂמִים רֹאשׁ, מָר-דְּרוֹר חֲמֵשׁ מֵאוֹת, וְקִנְּמָן-בֶּשֶׂם מַחֲצִיתוֹ חֲמִשִּׁים וּמָאתָיִם; וּקְנֵה-בֹשֶׂם, חֲמִשִּׁים וּמָאתָיִם.	וְאַתְּ סַב לָךְ, בֻּסְמִין רֵישָׁא, מֵירָא דָּכְיָא מַתְקַל חֲמֵישׁ מְאָה, וְקִנְּמָן בְּשַׂם פַּלְגוּתֵיהּ מַתְקַל מָאתַן וְחַמְשִׁין; וּקְנֵי בֻּסְמָא, מַתְקַל מָאתַן וְחַמְשִׁין.
ל,כד וְקִדָּה, חֲמֵשׁ מֵאוֹת בְּשֶׁקֶל הַקֹּדֶשׁ; וְשֶׁמֶן זַיִת, הִין.	וּקְצִיעֲתָא, מַתְקַל חֲמֵישׁ מְאָה בְּסִלְעֵי קֻדְשָׁא; וּמְשַׁח זֵיתָא, מְלֵי הִינָא.
ל,כה וְעָשִׂיתָ אֹתוֹ, שֶׁמֶן מִשְׁחַת-קֹדֶשׁ--רֹקַח מִרְקַחַת, מַעֲשֵׂה רֹקֵחַ; שֶׁמֶן מִשְׁחַת-קֹדֶשׁ, יִהְיֶה.	וְתַעֲבֵיד יָתֵיהּ, מְשַׁח רְבוּת קֻדְשָׁא--בֹּסֶם מְבֻסַּם, עוֹבָד בֻּסְמָנוּ; מְשַׁח רְבוּת קֻדְשָׁא, יְהֵי.
ל,כו וּמָשַׁחְתָּ בוֹ, אֶת-אֹהֶל מוֹעֵד, וְאֵת, אֲרוֹן הָעֵדֻת.	וּתְרַבֵּי בֵּיהּ, יָת מַשְׁכַּן זִמְנָא, וְיָת, אֲרוֹנָא דְּסָהֲדוּתָא.
ל,כז וְאֶת-הַשֻּׁלְחָן, וְאֶת-כָּל-כֵּלָיו, וְאֶת-הַמְּנֹרָה, וְאֶת-כֵּלֶיהָ; וְאֵת, מִזְבַּח הַקְּטֹרֶת.	וְיָת פָּתוּרָא, וְיָת כָּל מָנוֹהִי, וְיָת מְנָרְתָא, וְיָת מָנַהָא; וְיָת, מַדְבְּחָא דִּקְטֹרֶת בֻּסְמַיָּא.
ל,כח וְאֶת-מִזְבַּח הָעֹלָה, וְאֶת-כָּל-כֵּלָיו; וְאֶת-הַכִּיֹּר, וְאֶת-כַּנּוֹ.	וְיָת מַדְבְּחָא דַּעֲלָתָא, וְיָת כָּל מָנוֹהִי; וְיָת כִּיּוֹרָא, וְיָת בְּסִיסֵיהּ.
ל,כט וְקִדַּשְׁתָּ אֹתָם, וְהָיוּ קֹדֶשׁ קָדָשִׁים; כָּל-הַנֹּגֵעַ בָּהֶם, יִקְדָּשׁ.	וּתְקַדֵּישׁ יָתְהוֹן, וִיהוֹן קֹדֶשׁ קֻדְשִׁין; כָּל דְּיִקְרַב בְּהוֹן, יִתְקַדַּשׁ.
ל,ל וְאֶת-אַהֲרֹן וְאֶת-בָּנָיו, תִּמְשָׁח; וְקִדַּשְׁתָּ אֹתָם, לְכַהֵן לִי.	וְיָת אַהֲרוֹן וְיָת בְּנוֹהִי, תְּרַבֵּי; וּתְקַדֵּישׁ יָתְהוֹן, לְשַׁמָּשָׁא קֳדָמָי.
ל,לא וְאֶל-בְּנֵי יִשְׂרָאֵל, תְּדַבֵּר לֵאמֹר:  שֶׁמֶן מִשְׁחַת-קֹדֶשׁ יִהְיֶה זֶה, לִי--לְדֹרֹתֵיכֶם.	וְעִם בְּנֵי יִשְׂרָאֵל, תְּמַלֵּיל לְמֵימַר:  מְשַׁח רְבוּת קֻדְשָׁא יְהֵי דֵּין, קֳדָמַי--לְדָרֵיכוֹן.
ל,לב עַל-בְּשַׂר אָדָם, לֹא יִיסָךְ, וּבְמַתְכֻּנְתּוֹ, לֹא תַעֲשׂוּ כָּמֹהוּ; קֹדֶשׁ הוּא, קֹדֶשׁ יִהְיֶה לָכֶם.	עַל בִּסְרָא דַּאֲנָשָׁא, לָא יִתַּסַּךְ, וּבִדְמוּתֵיהּ, לָא תַּעְבְּדוּן כְּוָתֵיהּ; קֻדְשָׁא הוּא, קֻדְשָׁא יְהֵי לְכוֹן.
ל,לג אִישׁ אֲשֶׁר יִרְקַח כָּמֹהוּ, וַאֲשֶׁר יִתֵּן מִמֶּנּוּ עַל-זָר--וְנִכְרַת, מֵעַמָּיו.  {ס}	גְּבַר דִּיבַסֵּים דִּכְוָתֵיהּ, וּדְיִתֵּין מִנֵּיהּ עַל חִילוֹנַי--וְיִשְׁתֵּיצֵי, מֵעַמֵּיהּ.  {ס}
ל,לד וַיֹּאמֶר יְהוָה אֶל-מֹשֶׁה קַח-לְךָ סַמִּים, נָטָף וּשְׁחֵלֶת וְחֶלְבְּנָה, סַמִּים, וּלְבֹנָה זַכָּה:  בַּד בְּבַד, יִהְיֶה.	וַאֲמַר יְיָ לְמֹשֶׁה סַב לָךְ בֻּסְמִין, נָטוֹפָא וְטֻפְרָא וְחֶלְבּוֹנְתָא, בֻּסְמִין, וּלְבוֹנְתָא דָּכִיתָא:  מַתְקַל בְּמַתְקַל, יְהֵי.
ל,לה וְעָשִׂיתָ אֹתָהּ קְטֹרֶת, רֹקַח מַעֲשֵׂה רוֹקֵחַ, מְמֻלָּח, טָהוֹר קֹדֶשׁ.	וְתַעֲבֵיד יָתַהּ קְטֹרֶת בֻּסְמִין, בֹּסֶם עוֹבָד בֻּסְמָנוּ, מְעָרַב, דְּכֵי לְקֻדְשָׁא.
ל,לו וְשָׁחַקְתָּ מִמֶּנָּה, הָדֵק, וְנָתַתָּה מִמֶּנָּה לִפְנֵי הָעֵדֻת בְּאֹהֶל מוֹעֵד, אֲשֶׁר אִוָּעֵד לְךָ שָׁמָּה; קֹדֶשׁ קָדָשִׁים, תִּהְיֶה לָכֶם.	וְתִשְׁחוֹק מִנַּהּ, וְתַדֵּיק, וְתִתֵּין מִנַּהּ קֳדָם סָהֲדוּתָא בְּמַשְׁכַּן זִמְנָא, דַּאֲזָמֵין מֵימְרִי לָךְ תַּמָּן; קֹדֶשׁ קֻדְשִׁין, תְּהֵי לְכוֹן.
ל,לז וְהַקְּטֹרֶת, אֲשֶׁר תַּעֲשֶׂה--בְּמַתְכֻּנְתָּהּ, לֹא תַעֲשׂוּ לָכֶם; קֹדֶשׁ תִּהְיֶה לְךָ, לַיהוָה.	וּקְטֹרֶת בֻּסְמִין, דְּתַעֲבֵיד--בִּדְמוּתַהּ, לָא תַּעְבְּדוּן לְכוֹן; קֻדְשָׁא תְּהֵי לָךְ, קֳדָם יְיָ.
ל,לח אִישׁ אֲשֶׁר-יַעֲשֶׂה כָמוֹהָ, לְהָרִיחַ בָּהּ--וְנִכְרַת, מֵעַמָּיו.  {ס}	גְּבַר דְּיַעֲבֵיד דִּכְוָתַהּ, לְאָרָחָא בַּהּ--וְיִשְׁתֵּיצֵי, מֵעַמֵּיהּ.  {ס}
לא,א וַיְדַבֵּר יְהוָה, אֶל-מֹשֶׁה לֵּאמֹר.	וּמַלֵּיל יְיָ, עִם מֹשֶׁה לְמֵימַר.
לא,ב רְאֵה, קָרָאתִי בְשֵׁם, בְּצַלְאֵל בֶּן-אוּרִי בֶן-חוּר, לְמַטֵּה יְהוּדָה.	חֲזִי, דְּרַבִּיתִי בְּשׁוֹם, בְּצַלְאֵל בַּר אוּרִי בַּר חוּר, לְשִׁבְטָא דִּיהוּדָה.
לא,ג וָאֲמַלֵּא אֹתוֹ, רוּחַ אֱלֹהִים, בְּחָכְמָה וּבִתְבוּנָה וּבְדַעַת, וּבְכָל-מְלָאכָה.	וְאַשְׁלֵימִית עִמֵּיהּ, רוּחַ מִן קֳדָם יְיָ, בְּחָכְמָא וּבְסֻכְלְתָנוּ וּבְמַדַּע, וּבְכָל עֲבִידָא.
לא,ד לַחְשֹׁב, מַחֲשָׁבֹת; לַעֲשׂוֹת בַּזָּהָב וּבַכֶּסֶף, וּבַנְּחֹשֶׁת.	לְאַלָּפָא, אֻמָּנְוָן; לְמֶעֱבַד בְּדַהְבָּא וּבְכַסְפָּא, וּבִנְחָשָׁא.
לא,ה וּבַחֲרֹשֶׁת אֶבֶן לְמַלֹּאת, וּבַחֲרֹשֶׁת עֵץ; לַעֲשׂוֹת, בְּכָל-מְלָאכָה.	וּבְאֻמָּנוּת אֶבֶן טָבָא לְאַשְׁלָמָא, וּבְנַגָּרוּת אָעָא; לְמֶעֱבַד, בְּכָל עֲבִידָא.
לא,ו וַאֲנִי הִנֵּה נָתַתִּי אִתּוֹ, אֵת אָהֳלִיאָב בֶּן-אֲחִיסָמָךְ לְמַטֵּה-דָן, וּבְלֵב כָּל-חֲכַם-לֵב, נָתַתִּי חָכְמָה; וְעָשׂוּ, אֵת כָּל-אֲשֶׁר צִוִּיתִךָ.	וַאֲנָא הָא יְהַבִית עִמֵּיהּ, יָת אָהֳלִיאָב בַּר אֲחִיסָמָךְ לְשִׁבְטָא דְּדָן, וּבְלֵב כָּל חַכִּימֵי לִבָּא, יְהַבִית חָכְמְתָא; וְיַעְבְּדוּן, יָת כָּל דְּפַקֵּידְתָּךְ.
לא,ז אֵת אֹהֶל מוֹעֵד, וְאֶת-הָאָרֹן לָעֵדֻת, וְאֶת-הַכַּפֹּרֶת, אֲשֶׁר עָלָיו; וְאֵת, כָּל-כְּלֵי הָאֹהֶל.	יָת מַשְׁכַּן זִמְנָא, וְיָת אֲרוֹנָא לְסָהֲדוּתָא, וְיָת כָּפֻרְתָּא, דַּעֲלוֹהִי; וְיָת, כָּל מָנֵי מַשְׁכְּנָא.
לא,ח וְאֶת-הַשֻּׁלְחָן, וְאֶת-כֵּלָיו, וְאֶת-הַמְּנֹרָה הַטְּהֹרָה, וְאֶת-כָּל-כֵּלֶיהָ; וְאֵת, מִזְבַּח הַקְּטֹרֶת.	וְיָת פָּתוּרָא, וְיָת מָנוֹהִי, וְיָת מְנָרְתָא דָּכִיתָא, וְיָת כָּל מָנַהָא; וְיָת, מַדְבְּחָא דִּקְטֹרֶת בֻּסְמַיָּא.
לא,ט וְאֶת-מִזְבַּח הָעֹלָה, וְאֶת-כָּל-כֵּלָיו; וְאֶת-הַכִּיּוֹר, וְאֶת-כַּנּוֹ.	וְיָת מַדְבְּחָא דַּעֲלָתָא, וְיָת כָּל מָנוֹהִי; וְיָת כִּיּוֹרָא, וְיָת בְּסִיסֵיהּ.
לא,י וְאֵת, בִּגְדֵי הַשְּׂרָד; וְאֶת-בִּגְדֵי הַקֹּדֶשׁ לְאַהֲרֹן הַכֹּהֵן, וְאֶת-בִּגְדֵי בָנָיו לְכַהֵן.	וְיָת, לְבוּשֵׁי שִׁמּוּשָׁא; וְיָת לְבוּשֵׁי קֻדְשָׁא לְאַהֲרוֹן כָּהֲנָא, וְיָת לְבוּשֵׁי בְּנוֹהִי לְשַׁמָּשָׁא.
לא,יא וְאֵת שֶׁמֶן הַמִּשְׁחָה וְאֶת-קְטֹרֶת הַסַּמִּים, לַקֹּדֶשׁ:  כְּכֹל אֲשֶׁר-צִוִּיתִךָ, יַעֲשׂוּ.  {פ}	וְיָת מִשְׁחָא דִּרְבוּתָא וְיָת קְטֹרֶת בֻּסְמַיָּא, לְקֻדְשָׁא:  כְּכֹל דְּפַקֵּידְתָּךְ, יַעְבְּדוּן.  {פ}
לא,יב וַיֹּאמֶר יְהוָה, אֶל-מֹשֶׁה לֵּאמֹר.	וַאֲמַר יְיָ, לְמֹשֶׁה לְמֵימַר.
לא,יג וְאַתָּה דַּבֵּר אֶל-בְּנֵי יִשְׂרָאֵל, לֵאמֹר, אַךְ אֶת-שַׁבְּתֹתַי, תִּשְׁמֹרוּ:  כִּי אוֹת הִוא בֵּינִי וּבֵינֵיכֶם, לְדֹרֹתֵיכֶם--לָדַעַת, כִּי אֲנִי יְהוָה מְקַדִּשְׁכֶם.	וְאַתְּ מַלֵּיל עִם בְּנֵי יִשְׂרָאֵל, לְמֵימַר, בְּרַם יָת יוֹמֵי שַׁבַּיָּא דִּילִי, תִּטְּרוּן:  אֲרֵי אָת הִיא בֵּין מֵימְרִי וּבֵינֵיכוֹן, לְדָרֵיכוֹן--לְמִדַּע, אֲרֵי אֲנָא יְיָ מְקַדִּשְׁכוֹן.
לא,יד וּשְׁמַרְתֶּם, אֶת-הַשַּׁבָּת, כִּי קֹדֶשׁ הִוא, לָכֶם; מְחַלְלֶיהָ, מוֹת יוּמָת--כִּי כָּל-הָעֹשֶׂה בָהּ מְלָאכָה, וְנִכְרְתָה הַנֶּפֶשׁ הַהִוא מִקֶּרֶב עַמֶּיהָ.	וְתִטְּרוּן, יָת שַׁבְּתָא, אֲרֵי קֻדְשָׁא הִיא, לְכוֹן; דְּיַחֲלִנַּהּ, אִתְקְטָלָא יִתְקְטִיל--אֲרֵי כָּל דְּיַעֲבֵיד בַּהּ עֲבִידְתָא, וְיִשְׁתֵּיצֵי אֲנָשָׁא הַהוּא מִגּוֹ עַמֵּיהּ.
לא,טו שֵׁשֶׁת יָמִים, יֵעָשֶׂה מְלָאכָה, וּבַיּוֹם הַשְּׁבִיעִי שַׁבַּת שַׁבָּתוֹן קֹדֶשׁ, לַיהוָה; כָּל-הָעֹשֶׂה מְלָאכָה בְּיוֹם הַשַּׁבָּת, מוֹת יוּמָת.	שִׁתָּא יוֹמִין, תִּתְעֲבֵיד עֲבִידְתָא, וּבְיוֹמָא שְׁבִיעָאָה שַׁבָּא שַׁבָּתָא קֻדְשָׁא, קֳדָם יְיָ; כָּל דְּיַעֲבֵיד עֲבִידְתָא בְּיוֹמָא דְּשַׁבְּתָא, אִתְקְטָלָא יִתְקְטִיל.
לא,טז וְשָׁמְרוּ בְנֵי-יִשְׂרָאֵל, אֶת-הַשַּׁבָּת, לַעֲשׂוֹת אֶת-הַשַּׁבָּת לְדֹרֹתָם, בְּרִית עוֹלָם.	וְיִטְּרוּן בְּנֵי יִשְׂרָאֵל, יָת שַׁבְּתָא, לְמֶעֱבַד יָת שַׁבְּתָא לְדָרֵיהוֹן, קְיָם עָלַם.
לא,יז בֵּינִי, וּבֵין בְּנֵי יִשְׂרָאֵל--אוֹת הִוא, לְעֹלָם:  כִּי-שֵׁשֶׁת יָמִים, עָשָׂה יְהוָה אֶת-הַשָּׁמַיִם וְאֶת-הָאָרֶץ, וּבַיּוֹם הַשְּׁבִיעִי, שָׁבַת וַיִּנָּפַשׁ.  {ס}	בֵּין מֵימְרִי, וּבֵין בְּנֵי יִשְׂרָאֵל--אָת הִיא, לְעָלַם:  אֲרֵי שִׁתָּא יוֹמִין, עֲבַד יְיָ יָת שְׁמַיָּא וְיָת אַרְעָא, וּבְיוֹמָא שְׁבִיעָאָה, שְׁבָת וְנָח.  {ס}
לא,יח וַיִּתֵּן אֶל-מֹשֶׁה, כְּכַלֹּתוֹ לְדַבֵּר אִתּוֹ בְּהַר סִינַי, שְׁנֵי, לֻחֹת הָעֵדֻת--לֻחֹת אֶבֶן, כְּתֻבִים בְּאֶצְבַּע אֱלֹהִים.	וִיהַב לְמֹשֶׁה, כַּד שֵׁיצֵי לְמַלָּלָא עִמֵּיהּ בְּטוּרָא דְּסִינַי, תְּרֵין, לוּחֵי סָהֲדוּתָא--לוּחֵי אַבְנָא, כְּתִיבִין בְּאֶצְבְּעָא דַּייָ.
לב,א וַיַּרְא הָעָם, כִּי-בֹשֵׁשׁ מֹשֶׁה לָרֶדֶת מִן-הָהָר; וַיִּקָּהֵל הָעָם עַל-אַהֲרֹן, וַיֹּאמְרוּ אֵלָיו קוּם עֲשֵׂה-לָנוּ אֱלֹהִים אֲשֶׁר יֵלְכוּ לְפָנֵינוּ--כִּי-זֶה מֹשֶׁה הָאִישׁ אֲשֶׁר הֶעֱלָנוּ מֵאֶרֶץ מִצְרַיִם, לֹא יָדַעְנוּ מֶה-הָיָה לוֹ.	וַחֲזָא עַמָּא, אֲרֵי אוֹחַר מֹשֶׁה לְמֵיחַת מִן טוּרָא; וְאִתְכְּנֵישׁ עַמָּא עַל אַהֲרוֹן, וַאֲמַרוּ לֵיהּ קוּם עֲבֵיד לַנָא דַּחְלָן דִּיהָכוּן קֳדָמַנָא--אֲרֵי דֵּין מֹשֶׁה גֻּבְרָא דְּאַסְּקַנָא מֵאַרְעָא דְּמִצְרַיִם, לָא יְדַעְנָא מָא הֲוָה לֵיהּ.
לב,ב וַיֹּאמֶר אֲלֵהֶם, אַהֲרֹן, פָּרְקוּ נִזְמֵי הַזָּהָב, אֲשֶׁר בְּאָזְנֵי נְשֵׁיכֶם בְּנֵיכֶם וּבְנֹתֵיכֶם; וְהָבִיאוּ, אֵלָי.	וַאֲמַר לְהוֹן, אַהֲרוֹן, פָּרִיקוּ קְדָשֵׁי דְּדַהְבָּא, דִּבְאֻדְנֵי נְשֵׁיכוֹן בְּנֵיכוֹן וּבְנָתְכוֹן; וְאֵיתוֹ, לְוָתִי.
לב,ג וַיִּתְפָּרְקוּ, כָּל-הָעָם, אֶת-נִזְמֵי הַזָּהָב, אֲשֶׁר בְּאָזְנֵיהֶם; וַיָּבִיאוּ, אֶל-אַהֲרֹן.	וּפָרִיקוּ, כָּל עַמָּא, יָת קְדָשֵׁי דְּדַהְבָּא, דִּבְאֻדְנֵיהוֹן; וְאֵיתִיאוּ, לְוָת אַהֲרוֹן.
לב,ד וַיִּקַּח מִיָּדָם, וַיָּצַר אֹתוֹ בַּחֶרֶט, וַיַּעֲשֵׂהוּ, עֵגֶל מַסֵּכָה; וַיֹּאמְרוּ--אֵלֶּה אֱלֹהֶיךָ יִשְׂרָאֵל, אֲשֶׁר הֶעֱלוּךָ מֵאֶרֶץ מִצְרָיִם.	וּנְסֵיב מִיַּדְהוֹן, וְצָר יָתֵיהּ בְּזִיפָא, וְעַבְדֵיהּ, עֵיגַל מַתְּכָא; וַאֲמַרוּ--אִלֵּין דַּחְלָתָךְ יִשְׂרָאֵל, דְּאַסְּקוּךְ מֵאַרְעָא דְּמִצְרָיִם.
לב,ה וַיַּרְא אַהֲרֹן, וַיִּבֶן מִזְבֵּחַ לְפָנָיו; וַיִּקְרָא אַהֲרֹן וַיֹּאמַר, חַג לַיהוָה מָחָר.	וַחֲזָא אַהֲרוֹן, וּבְנָא מַדְבְּחָא קֳדָמוֹהִי; וּקְרָא אַהֲרוֹן וַאֲמַר, חַגָּא קֳדָם יְיָ מְחַר.
לב,ו וַיַּשְׁכִּימוּ, מִמָּחֳרָת, וַיַּעֲלוּ עֹלֹת, וַיַּגִּשׁוּ שְׁלָמִים; וַיֵּשֶׁב הָעָם לֶאֱכֹל וְשָׁתוֹ, וַיָּקֻמוּ לְצַחֵק.  {פ}	וְאַקְדִּימוּ, בְּיוֹמָא דְּבָתְרוֹהִי, וְאַסִּיקוּ עֲלָוָן, וְקָרִיבוּ נִכְסָן; וְאַסְחַר עַמָּא לְמֵיכַל וּלְמִשְׁתֵּי, וְקָמוּ לְחַיָּכָא.  {פ}
לב,ז וַיְדַבֵּר יְהוָה, אֶל-מֹשֶׁה:  לֶךְ-רֵד--כִּי שִׁחֵת עַמְּךָ, אֲשֶׁר הֶעֱלֵיתָ מֵאֶרֶץ מִצְרָיִם.	וּמַלֵּיל יְיָ, עִם מֹשֶׁה:  אִיזֵיל חוֹת--אֲרֵי חַבֵּיל עַמָּךְ, דְּאַסֵּיקְתָּא מֵאַרְעָא דְּמִצְרָיִם.
לב,ח סָרוּ מַהֵר, מִן-הַדֶּרֶךְ אֲשֶׁר צִוִּיתִם--עָשׂוּ לָהֶם, עֵגֶל מַסֵּכָה; וַיִּשְׁתַּחֲווּ-לוֹ, וַיִּזְבְּחוּ-לוֹ, וַיֹּאמְרוּ, אֵלֶּה אֱלֹהֶיךָ יִשְׂרָאֵל אֲשֶׁר הֶעֱלוּךָ מֵאֶרֶץ מִצְרָיִם.	סְטוֹ בִּפְרִיעַ, מִן אוֹרְחָא דְּפַקֵּידְתִּנּוּן--עֲבַדוּ לְהוֹן, עֵיגַל מַתְּכָא; וּסְגִידוּ לֵיהּ, וְדַבַּחוּ לֵיהּ, וַאֲמַרוּ, אִלֵּין דַּחְלָתָךְ יִשְׂרָאֵל דְּאַסְּקוּךְ מֵאַרְעָא דְּמִצְרָיִם.
לב,ט וַיֹּאמֶר יְהוָה, אֶל-מֹשֶׁה:  רָאִיתִי אֶת-הָעָם הַזֶּה, וְהִנֵּה עַם-קְשֵׁה-עֹרֶף הוּא.	וַאֲמַר יְיָ, לְמֹשֶׁה:  גְּלֵי קֳדָמַי עַמָּא הָדֵין, וְהָא עַם קְשֵׁי קְדָל הוּא.
לב,י וְעַתָּה הַנִּיחָה לִּי, וְיִחַר-אַפִּי בָהֶם וַאֲכַלֵּם; וְאֶעֱשֶׂה אוֹתְךָ, לְגוֹי גָּדוֹל.	וּכְעַן אָנַח בָּעוּתָךְ מִן קֳדָמַי, וְיִתְקַף רֻגְזִי בְּהוֹן וַאֲשֵׁיצֵינוּן; וְאַעֲבֵיד יָתָךְ, לְעַם סַגִּי.
לב,יא וַיְחַל מֹשֶׁה, אֶת-פְּנֵי יְהוָה אֱלֹהָיו; וַיֹּאמֶר, לָמָה יְהוָה יֶחֱרֶה אַפְּךָ בְּעַמֶּךָ, אֲשֶׁר הוֹצֵאתָ מֵאֶרֶץ מִצְרַיִם, בְּכֹחַ גָּדוֹל וּבְיָד חֲזָקָה.	וְצַלִּי מֹשֶׁה, קֳדָם יְיָ אֱלָהֵיהּ; וַאֲמַר, לְמָא יְיָ יִתְקַף רֻגְזָךְ בְּעַמָּךְ, דְּאַפֵּיקְתָּא מֵאַרְעָא דְּמִצְרַיִם, בְּחֵיל רַב וּבְיַד תַּקִּיפָא.
לב,יב לָמָּה יֹאמְרוּ מִצְרַיִם לֵאמֹר, בְּרָעָה הוֹצִיאָם לַהֲרֹג אֹתָם בֶּהָרִים, וּלְכַלֹּתָם, מֵעַל פְּנֵי הָאֲדָמָה; שׁוּב מֵחֲרוֹן אַפֶּךָ, וְהִנָּחֵם עַל-הָרָעָה לְעַמֶּךָ.	לְמָא יֵימְרוּן מִצְרָאֵי לְמֵימַר, בְּבִישָׁא אַפֵּיקִנּוּן לְקַטָּלָא יָתְהוֹן בֵּינֵי טוּרַיָּא, וּלְשֵׁיצָיוּתְהוֹן, מֵעַל אַפֵּי אַרְעָא; תּוּב מִתְּקוֹף רֻגְזָךְ, תּוּב מִן בִּשְׁתָּא דְּמַלֵּילְתָּא לְמֶעֱבַד לְעַמָּךְ.
לב,יג זְכֹר לְאַבְרָהָם לְיִצְחָק וּלְיִשְׂרָאֵל עֲבָדֶיךָ, אֲשֶׁר נִשְׁבַּעְתָּ לָהֶם בָּךְ, וַתְּדַבֵּר אֲלֵהֶם, אַרְבֶּה אֶת-זַרְעֲכֶם כְּכוֹכְבֵי הַשָּׁמָיִם; וְכָל-הָאָרֶץ הַזֹּאת אֲשֶׁר אָמַרְתִּי, אֶתֵּן לְזַרְעֲכֶם, וְנָחֲלוּ, לְעֹלָם.	אִדְּכַר לְאַבְרָהָם לְיִצְחָק וּלְיִשְׂרָאֵל עַבְדָךְ, דְּקַיֵּימְתָּא לְהוֹן בְּמֵימְרָךְ, וּמַלֵּילְתָּא עִמְּהוֹן, אַסְגֵּי יָת בְּנֵיכוֹן כְּכוֹכְבֵי שְׁמַיָּא; וְכָל אַרְעָא הָדָא דַּאֲמַרִית, אֶתֵּין לִבְנֵיכוֹן, וְיַחְסְנוּן, לְעָלַם.
לב,יד וַיִּנָּחֶם, יְהוָה, עַל-הָרָעָה, אֲשֶׁר דִּבֶּר לַעֲשׂוֹת לְעַמּוֹ.  {פ}	וְתָב, יְיָ, מִן בִּשְׁתָּא, דְּמַלֵּיל לְמֶעֱבַד לְעַמֵּיהּ.  {פ}
לב,טו וַיִּפֶן וַיֵּרֶד מֹשֶׁה, מִן-הָהָר, וּשְׁנֵי לֻחֹת הָעֵדֻת, בְּיָדוֹ:  לֻחֹת, כְּתֻבִים מִשְּׁנֵי עֶבְרֵיהֶם--מִזֶּה וּמִזֶּה, הֵם כְּתֻבִים.	וְאִתְפְּנִי וּנְחַת מֹשֶׁה, מִן טוּרָא, וּתְרֵין לוּחֵי סָהֲדוּתָא, בִּידֵיהּ:  לוּחֵי, כְּתִיבִין מִתְּרֵין עֶבְרֵיהוֹן--מִכָּא וּמִכָּא, אִנּוּן כְּתִיבִין.
לב,טז וְהַלֻּחֹת--מַעֲשֵׂה אֱלֹהִים, הֵמָּה; וְהַמִּכְתָּב, מִכְתַּב אֱלֹהִים הוּא--חָרוּת, עַל-הַלֻּחֹת.	וְלוּחַיָּא--עוּבָדָא דַּייָ, אִנּוּן; וּכְתָבָא, כְּתָבָא דַּייָ הוּא--מְפָרַשׁ, עַל לוּחַיָּא.
לב,יז וַיִּשְׁמַע יְהוֹשֻׁעַ אֶת-קוֹל הָעָם, בְּרֵעֹה; וַיֹּאמֶר, אֶל-מֹשֶׁה, קוֹל מִלְחָמָה, בַּמַּחֲנֶה.	וּשְׁמַע יְהוֹשׁוּעַ יָת קָל עַמָּא, כַּד מְיַבְּבִין; וַאֲמַר, לְמֹשֶׁה, קָל קְרָבָא, בְּמַשְׁרִיתָא.
לב,יח וַיֹּאמֶר, אֵין קוֹל עֲנוֹת גְּבוּרָה, וְאֵין קוֹל, עֲנוֹת חֲלוּשָׁה; קוֹל עַנּוֹת, אָנֹכִי שֹׁמֵעַ.	וַאֲמַר, לָא קָל גִּבָּרִין דְּנָצְחִין בִּקְרָבָא, וְאַף לָא קָל, חַלָּשִׁין דְּמִתַּבְּרִין; קָל דִּמְחָיְכִין, אֲנָא שָׁמַע.
לב,יט וַיְהִי, כַּאֲשֶׁר קָרַב אֶל-הַמַּחֲנֶה, וַיַּרְא אֶת-הָעֵגֶל, וּמְחֹלֹת; וַיִּחַר-אַף מֹשֶׁה, וַיַּשְׁלֵךְ מִיָּדָו אֶת-הַלֻּחֹת, וַיְשַׁבֵּר אֹתָם, תַּחַת הָהָר.	וַהֲוָה, כַּד קְרֵיב לְמַשְׁרִיתָא, וַחֲזָא יָת עִגְלָא, וְחִנְגִין; וּתְקֵיף רֻגְזָא דְּמֹשֶׁה, וּרְמָא מִיְּדוֹהִי יָת לוּחַיָּא, וְתַבַּר יָתְהוֹן, בְּשִׁפּוֹלֵי טוּרָא.
לב,כ וַיִּקַּח אֶת-הָעֵגֶל אֲשֶׁר עָשׂוּ, וַיִּשְׂרֹף בָּאֵשׁ, וַיִּטְחַן, עַד אֲשֶׁר-דָּק; וַיִּזֶר עַל-פְּנֵי הַמַּיִם, וַיַּשְׁקְ אֶת-בְּנֵי יִשְׂרָאֵל.	וּנְסֵיב יָת עִגְלָא דַּעֲבַדוּ, וְאוֹקֵיד בְּנוּרָא, וְשָׁף, עַד דַּהֲוָה דַּקִיק; וּדְרָא עַל אַפֵּי מַיָּא, וְאַשְׁקִי יָת בְּנֵי יִשְׂרָאֵל.
לב,כא וַיֹּאמֶר מֹשֶׁה אֶל-אַהֲרֹן, מֶה-עָשָׂה לְךָ הָעָם הַזֶּה:  כִּי-הֵבֵאתָ עָלָיו, חֲטָאָה גְדֹלָה.	וַאֲמַר מֹשֶׁה לְאַהֲרוֹן, מָא עֲבַד לָךְ עַמָּא הָדֵין:  אֲרֵי אֵיתִיתָא עֲלוֹהִי, חוֹבָא רַבָּא.
לב,כב וַיֹּאמֶר אַהֲרֹן, אַל-יִחַר אַף אֲדֹנִי; אַתָּה יָדַעְתָּ אֶת-הָעָם, כִּי בְרָע הוּא.	וַאֲמַר אַהֲרוֹן, לָא יִתְקַף רֻגְזָא דְּרִבּוֹנִי; אַתְּ יְדַעְתְּ יָת עַמָּא, אֲרֵי בְּבִישׁ הוּא.
לב,כג וַיֹּאמְרוּ לִי--עֲשֵׂה-לָנוּ אֱלֹהִים, אֲשֶׁר יֵלְכוּ לְפָנֵינוּ:  כִּי-זֶה מֹשֶׁה הָאִישׁ, אֲשֶׁר הֶעֱלָנוּ מֵאֶרֶץ מִצְרַיִם--לֹא יָדַעְנוּ, מֶה-הָיָה לוֹ.	וַאֲמַרוּ לִי--עֲבֵיד לַנָא דַּחְלָן, דִּיהָכוּן קֳדָמַנָא:  אֲרֵי דֵּין מֹשֶׁה גֻּבְרָא, דְּאַסְּקַנָא מֵאַרְעָא דְּמִצְרַיִם--לָא יְדַעְנָא, מָא הֲוָה לֵיהּ.
לב,כד וָאֹמַר לָהֶם לְמִי זָהָב, הִתְפָּרָקוּ וַיִּתְּנוּ-לִי; וָאַשְׁלִכֵהוּ בָאֵשׁ, וַיֵּצֵא הָעֵגֶל הַזֶּה.	וַאֲמַרִית לְהוֹן לְמַאן דַּהְבָּא, פָּרִיקוּ וִיהַבוּ לִי; וּרְמֵיתֵיהּ בְּנוּרָא, וּנְפַק עִגְלָא הָדֵין.
לב,כה וַיַּרְא מֹשֶׁה אֶת-הָעָם, כִּי פָרֻעַ הוּא:  כִּי-פְרָעֹה אַהֲרֹן, לְשִׁמְצָה בְּקָמֵיהֶם.	וַחֲזָא מֹשֶׁה יָת עַמָּא, אֲרֵי בְּטִיל הוּא:  אֲרֵי בַּטֵּילִנּוּן אַהֲרוֹן, לְאַסָּבוּתְהוֹן שׁוֹם בִּישׁ בְּדָרֵיהוֹן.
לב,כו וַיַּעֲמֹד מֹשֶׁה, בְּשַׁעַר הַמַּחֲנֶה, וַיֹּאמֶר, מִי לַיהוָה אֵלָי; וַיֵּאָסְפוּ אֵלָיו, כָּל-בְּנֵי לֵוִי.	וְקָם מֹשֶׁה, בִּתְרַע מַשְׁרִיתָא, וַאֲמַר, מַאן דָּחֲלַיָּא דַּייָ יֵיתוֹן לְוָתִי; וְאִתְכְּנִישׁוּ לְוָתֵיהּ, כָּל בְּנֵי לֵוִי.
לב,כז וַיֹּאמֶר לָהֶם, כֹּה-אָמַר יְהוָה אֱלֹהֵי יִשְׂרָאֵל, שִׂימוּ אִישׁ-חַרְבּוֹ, עַל-יְרֵכוֹ; עִבְרוּ וָשׁוּבוּ מִשַּׁעַר לָשַׁעַר, בַּמַּחֲנֶה, וְהִרְגוּ אִישׁ-אֶת-אָחִיו וְאִישׁ אֶת-רֵעֵהוּ, וְאִישׁ אֶת-קְרֹבוֹ.	וַאֲמַר לְהוֹן, כִּדְנָן אֲמַר יְיָ אֱלָהָא דְּיִשְׂרָאֵל, שַׁוּוֹ גְּבַר חַרְבֵּיהּ, עַל יִרְכֵּיהּ; עֵיבַרוּ וְתוּבוּ מִתְּרַע לִתְרַע, בְּמַשְׁרִיתָא, וּקְטוּלוּ גְּבַר יָת אֲחוּהִי וּגְבַר יָת חַבְרֵיהּ, וַאֲנָשׁ יָת קָרִיבֵיהּ.
לב,כח וַיַּעֲשׂוּ בְנֵי-לֵוִי, כִּדְבַר מֹשֶׁה; וַיִּפֹּל מִן-הָעָם בַּיּוֹם הַהוּא, כִּשְׁלֹשֶׁת אַלְפֵי אִישׁ.	וַעֲבַדוּ בְּנֵי לֵוִי, כְּפִתְגָמָא דְּמֹשֶׁה; וּנְפַל מִן עַמָּא בְּיוֹמָא הַהוּא, כִּתְלָתָא אַלְפִין גֻּבְרָא.
לב,כט וַיֹּאמֶר מֹשֶׁה, מִלְאוּ יֶדְכֶם הַיּוֹם לַיהוָה, כִּי אִישׁ בִּבְנוֹ, וּבְאָחִיו--וְלָתֵת עֲלֵיכֶם הַיּוֹם, בְּרָכָה.	וַאֲמַר מֹשֶׁה, קָרִיבוּ יַדְכוֹן יוֹמָא דֵּין קֻרְבָּנָא קֳדָם יְיָ, אֲרֵי גְּבַר בִּבְרֵיהּ, וּבַאֲחוּהִי--וּלְאֵיתָאָה עֲלֵיכוֹן יוֹמָא דֵּין, בִּרְכָן.
לב,ל וַיְהִי, מִמָּחֳרָת, וַיֹּאמֶר מֹשֶׁה אֶל-הָעָם, אַתֶּם חֲטָאתֶם חֲטָאָה גְדֹלָה; וְעַתָּה אֶעֱלֶה אֶל-יְהוָה, אוּלַי אֲכַפְּרָה בְּעַד חַטַּאתְכֶם.	וַהֲוָה, בְּיוֹמָא דְּבָתְרוֹהִי, וַאֲמַר מֹשֶׁה לְעַמָּא, אַתּוּן חַבְתּוּן חוֹבָא רַבָּא; וּכְעַן אֶסַּק לִקְדָם יְיָ, מָאִם אֲכַפַּר עַל חוֹבֵיכוֹן.
לב,לא וַיָּשָׁב מֹשֶׁה אֶל-יְהוָה, וַיֹּאמַר:  אָנָּא, חָטָא הָעָם הַזֶּה חֲטָאָה גְדֹלָה, וַיַּעֲשׂוּ לָהֶם, אֱלֹהֵי זָהָב.	וְתָב מֹשֶׁה לִקְדָם יְיָ, וַאֲמַר:  בְּבָעוּ, חָב עַמָּא הָדֵין חוֹבָא רַבָּא, וַעֲבַדוּ לְהוֹן, דַּחְלָן דִּדְהַב.
לב,לב וְעַתָּה, אִם-תִּשָּׂא חַטָּאתָם; וְאִם-אַיִן--מְחֵנִי נָא, מִסִּפְרְךָ אֲשֶׁר כָּתָבְתָּ.	וּכְעַן, אִם שְׁבַקְתְּ לְחוֹבֵיהוֹן; וְאִם לָא--מְחֵינִי כְּעַן, מִסִּפְרָךְ דִּכְתַבְתָּא.
לב,לג וַיֹּאמֶר יְהוָה, אֶל-מֹשֶׁה:  מִי אֲשֶׁר חָטָא-לִי, אֶמְחֶנּוּ מִסִּפְרִי.	וַאֲמַר יְיָ, לְמֹשֶׁה:  מַאן דְּחָב קֳדָמַי, אֶמְחֵינֵיהּ מִסִּפְרִי.
לב,לד וְעַתָּה לֵךְ נְחֵה אֶת-הָעָם, אֶל אֲשֶׁר-דִּבַּרְתִּי לָךְ--הִנֵּה מַלְאָכִי, יֵלֵךְ לְפָנֶיךָ; וּבְיוֹם פָּקְדִי, וּפָקַדְתִּי עֲלֵהֶם חַטָּאתָם.	וּכְעַן אִיזֵיל דַּבַּר יָת עַמָּא, לְאַתְרָא דְּמַלֵּילִית לָךְ--הָא מַלְאֲכִי, יְהָךְ קֳדָמָךְ; וּבְיוֹם אַסְעָרוּתִי, וְאַסְעַר עֲלֵיהוֹן חוֹבֵיהוֹן.
לב,לה וַיִּגֹּף יְהוָה, אֶת-הָעָם, עַל אֲשֶׁר עָשׂוּ אֶת-הָעֵגֶל, אֲשֶׁר עָשָׂה אַהֲרֹן.  {ס}	וּמְחָא יְיָ, יָת עַמָּא, עַל דְּאִשְׁתַּעֲבַדוּ לְעִגְלָא, דַּעֲבַד אַהֲרוֹן.  {ס}
לג,א וַיְדַבֵּר יְהוָה אֶל-מֹשֶׁה, לֵךְ עֲלֵה מִזֶּה--אַתָּה וְהָעָם, אֲשֶׁר הֶעֱלִיתָ מֵאֶרֶץ מִצְרָיִם:  אֶל-הָאָרֶץ, אֲשֶׁר נִשְׁבַּעְתִּי לְאַבְרָהָם לְיִצְחָק וּלְיַעֲקֹב לֵאמֹר, לְזַרְעֲךָ, אֶתְּנֶנָּה.	וּמַלֵּיל יְיָ עִם מֹשֶׁה, אִיזֵיל סַק מִכָּא--אַתְּ וְעַמָּא, דְּאַסֵּיקְתָּא מֵאַרְעָא דְּמִצְרָיִם:  לְאַרְעָא, דְּקַיֵּימִית לְאַבְרָהָם לְיִצְחָק וּלְיַעֲקוֹב לְמֵימַר, לִבְנָךְ, אֶתְּנִנַּהּ.
לג,ב וְשָׁלַחְתִּי לְפָנֶיךָ, מַלְאָךְ; וְגֵרַשְׁתִּי, אֶת-הַכְּנַעֲנִי הָאֱמֹרִי, וְהַחִתִּי וְהַפְּרִזִּי, הַחִוִּי וְהַיְבוּסִי.	וְאֶשְׁלַח קֳדָמָךְ, מַלְאֲכָא; וַאֲתָרֵיךְ, יָת כְּנַעֲנָאֵי אֱמוֹרָאֵי, וְחִתָּאֵי וּפְרִזָּאֵי, חִוָּאֵי וִיבוּסָאֵי.
לג,ג אֶל-אֶרֶץ זָבַת חָלָב, וּדְבָשׁ:  כִּי לֹא אֶעֱלֶה בְּקִרְבְּךָ, כִּי עַם-קְשֵׁה-עֹרֶף אַתָּה--פֶּן-אֲכֶלְךָ, בַּדָּרֶךְ.	לַאֲרַע עָבְדָא חֲלָב, וּדְבָשׁ:  אֲרֵי לָא אֲסַלֵּיק שְׁכִינְתִי מִבֵּינָךְ, אֲרֵי עַם קְשֵׁי קְדָל אַתְּ--דִּלְמָא אֲשֵׁיצֵינָךְ, בְּאוֹרְחָא.
לג,ד וַיִּשְׁמַע הָעָם, אֶת-הַדָּבָר הָרָע הַזֶּה--וַיִּתְאַבָּלוּ; וְלֹא-שָׁתוּ אִישׁ עֶדְיוֹ, עָלָיו.	וּשְׁמַע עַמָּא, יָת פִּתְגָמָא בִּישָׁא הָדֵין--וְאִתְאַבַּלוּ; וְלָא שַׁוּוֹ גְּבַר תִּקּוּן זֵינֵיהּ, עֲלוֹהִי.
לג,ה וַיֹּאמֶר יְהוָה אֶל-מֹשֶׁה, אֱמֹר אֶל-בְּנֵי-יִשְׂרָאֵל אַתֶּם עַם-קְשֵׁה-עֹרֶף--רֶגַע אֶחָד אֶעֱלֶה בְקִרְבְּךָ, וְכִלִּיתִיךָ; וְעַתָּה, הוֹרֵד עֶדְיְךָ מֵעָלֶיךָ, וְאֵדְעָה, מָה אֶעֱשֶׂה-לָּךְ.	וַאֲמַר יְיָ לְמֹשֶׁה, אֵימַר לִבְנֵי יִשְׂרָאֵל אַתּוּן עַם קְשֵׁי קְדָל--שָׁעָה חֲדָא אֲסַלֵּיק שְׁכִינְתִי מִבֵּינָךְ, וַאֲשֵׁיצֵינָךְ; וּכְעַן, אַעְדְּ תִּקּוּן זֵינָךְ מִנָּךְ--גְּלֵי קֳדָמַי, מָא אַעֲבֵיד לָךְ.
לג,ו וַיִּתְנַצְּלוּ בְנֵי-יִשְׂרָאֵל אֶת-עֶדְיָם, מֵהַר חוֹרֵב.	וְאַעְדּוֹ בְּנֵי יִשְׂרָאֵל יָת תִּקּוּן זֵינְהוֹן, מִטּוּרָא דְּחוֹרֵב.
לג,ז וּמֹשֶׁה יִקַּח אֶת-הָאֹהֶל וְנָטָה-לוֹ מִחוּץ לַמַּחֲנֶה, הַרְחֵק מִן-הַמַּחֲנֶה, וְקָרָא לוֹ, אֹהֶל מוֹעֵד; וְהָיָה, כָּל-מְבַקֵּשׁ יְהוָה, יֵצֵא אֶל-אֹהֶל מוֹעֵד, אֲשֶׁר מִחוּץ לַמַּחֲנֶה.	וּמֹשֶׁה נָסֵיב יָת מַשְׁכְּנָא וּפַרְסֵיהּ לֵיהּ מִבַּרָא לְמַשְׁרִיתָא, אַרְחֵיק מִן מַשְׁרִיתָא, וְקָרֵי לֵיהּ, מַשְׁכַּן בֵּית אֻלְפָנָא; וְהָוֵי, כָּל דְּתָבַע אֻלְפָן מִן קֳדָם יְיָ, נָפֵיק לְמַשְׁכַּן בֵּית אֻלְפָנָא, דְּמִבַּרָא לְמַשְׁרִיתָא.
לג,ח וְהָיָה, כְּצֵאת מֹשֶׁה אֶל-הָאֹהֶל, יָקוּמוּ כָּל-הָעָם, וְנִצְּבוּ אִישׁ פֶּתַח אָהֳלוֹ; וְהִבִּיטוּ אַחֲרֵי מֹשֶׁה, עַד-בֹּאוֹ הָאֹהֱלָה.	וְהָוֵי, כַּד נָפֵיק מֹשֶׁה לְמַשְׁכְּנָא, קָיְמִין כָּל עַמָּא, וּמִתְעַתְּדִין גְּבַר בִּתְרַע מַשְׁכְּנֵיהּ; וּמִסְתַּכְּלִין אֲחוֹרֵי מֹשֶׁה, עַד דְּעָלֵיל לְמַשְׁכְּנָא.
לג,ט וְהָיָה, כְּבֹא מֹשֶׁה הָאֹהֱלָה, יֵרֵד עַמּוּד הֶעָנָן, וְעָמַד פֶּתַח הָאֹהֶל; וְדִבֶּר, עִם-מֹשֶׁה.	וְהָוֵי, כַּד עָלֵיל מֹשֶׁה לְמַשְׁכְּנָא, נָחֵית עַמּוּדָא דַּעֲנָנָא, וְקָאֵים בִּתְרַע מַשְׁכְּנָא; וּמִתְמַלַּל, עִם מֹשֶׁה.
לג,י וְרָאָה כָל-הָעָם אֶת-עַמּוּד הֶעָנָן, עֹמֵד פֶּתַח הָאֹהֶל; וְקָם כָּל-הָעָם וְהִשְׁתַּחֲווּ, אִישׁ פֶּתַח אָהֳלוֹ.	וְחָזַן כָּל עַמָּא יָת עַמּוּדָא דַּעֲנָנָא, קָאֵים בִּתְרַע מַשְׁכְּנָא; וְקָיְמִין כָּל עַמָּא וְסָגְדִין, גְּבַר בִּתְרַע מַשְׁכְּנֵיהּ.
לג,יא וְדִבֶּר יְהוָה אֶל-מֹשֶׁה פָּנִים אֶל-פָּנִים, כַּאֲשֶׁר יְדַבֵּר אִישׁ אֶל-רֵעֵהוּ; וְשָׁב, אֶל-הַמַּחֲנֶה, וּמְשָׁרְתוֹ יְהוֹשֻׁעַ בִּן-נוּן נַעַר, לֹא יָמִישׁ מִתּוֹךְ הָאֹהֶל.  {פ}	וּמְמַלֵּיל יְיָ עִם מֹשֶׁה מַמְלַל עִם מַמְלַל, כְּמָא דִּימַלֵּיל גֻּבְרָא עִם חַבְרֵיהּ; וְתָאֵיב, לְמַשְׁרִיתָא, וּמְשֻׁמְשָׁנֵיהּ יְהוֹשׁוּעַ בַּר נוּן עוּלֵימָא, לָא עָדֵי מִגּוֹ מַשְׁכְּנָא.  {פ}
לג,יב וַיֹּאמֶר מֹשֶׁה אֶל-יְהוָה, רְאֵה אַתָּה אֹמֵר אֵלַי הַעַל אֶת-הָעָם הַזֶּה, וְאַתָּה לֹא הוֹדַעְתַּנִי, אֵת אֲשֶׁר-תִּשְׁלַח עִמִּי; וְאַתָּה אָמַרְתָּ יְדַעְתִּיךָ בְשֵׁם, וְגַם-מָצָאתָ חֵן בְּעֵינָי.	וַאֲמַר מֹשֶׁה קֳדָם יְיָ, חֲזִי דְּאַתְּ אָמַר לִי אַסֵּיק יָת עַמָּא הָדֵין, וְאַתְּ לָא הוֹדַעְתַּנִי, יָת דְּתִשְׁלַח עִמִּי; וְאַתְּ אֲמַרְתְּ רַבִּיתָךְ בְּשׁוֹם, וְאַף אַשְׁכַּחְתָּא רַחֲמִין קֳדָמָי.
לג,יג וְעַתָּה אִם-נָא מָצָאתִי חֵן בְּעֵינֶיךָ, הוֹדִעֵנִי נָא אֶת-דְּרָכֶךָ, וְאֵדָעֲךָ, לְמַעַן אֶמְצָא-חֵן בְּעֵינֶיךָ; וּרְאֵה, כִּי עַמְּךָ הַגּוֹי הַזֶּה.	וּכְעַן אִם כְּעַן אַשְׁכַּחִית רַחֲמִין קֳדָמָךְ, הוֹדַעְנִי כְּעַן יָת אוֹרַח טוּבָךְ, וְאֶדַּע רַחֲמָךְ, בְּדִיל דְּאַשְׁכַּח רַחֲמִין קֳדָמָךְ; וּגְלֵי קֳדָמָךְ, אֲרֵי עַמָּךְ עַמָּא הָדֵין.
לג,יד וַיֹּאמַר:  פָּנַי יֵלֵכוּ, וַהֲנִחֹתִי לָךְ.	וַאֲמַר:  שְׁכִינְתִי תְּהָךְ, וַאֲנִיחַ לָךְ.
לג,טו וַיֹּאמֶר, אֵלָיו:  אִם-אֵין פָּנֶיךָ הֹלְכִים, אַל-תַּעֲלֵנוּ מִזֶּה.	וַאֲמַר, קֳדָמוֹהִי:  אִם לֵית שְׁכִינְתָךְ מְהַלְּכָא בֵּינַנָא, לָא תַּסְּקִנַּנָא מִכָּא.
לג,טז וּבַמֶּה יִוָּדַע אֵפוֹא, כִּי-מָצָאתִי חֵן בְּעֵינֶיךָ אֲנִי וְעַמֶּךָ--הֲלוֹא, בְּלֶכְתְּךָ עִמָּנוּ; וְנִפְלִינוּ, אֲנִי וְעַמְּךָ, מִכָּל-הָעָם, אֲשֶׁר עַל-פְּנֵי הָאֲדָמָה.  {פ}	וּבְמָא יִתְיְדַע הָכָא, אֲרֵי אַשְׁכַּחִית רַחֲמִין קֳדָמָךְ אֲנָא וְעַמָּךְ--הֲלָא, בִּמְהָךְ שְׁכִינְתָךְ עִמַּנָא; וְיִתְעַבְדָן לַנָא פְּרִישָׁן, לִי וּלְעַמָּךְ, מְשֻׁנַּי מִכָּל עַמָּא, דְּעַל אַפֵּי אַרְעָא.  {פ}
לג,יז וַיֹּאמֶר יְהוָה אֶל-מֹשֶׁה, גַּם אֶת-הַדָּבָר הַזֶּה אֲשֶׁר דִּבַּרְתָּ אֶעֱשֶׂה:  כִּי-מָצָאתָ חֵן בְּעֵינַי, וָאֵדָעֲךָ בְּשֵׁם.	וַאֲמַר יְיָ לְמֹשֶׁה, אַף יָת פִּתְגָמָא הָדֵין דְּמַלֵּילְתָּא אַעֲבֵיד:  אֲרֵי אַשְׁכַּחְתָּא רַחֲמִין קֳדָמַי, וְרַבִּיתָךְ בְּשׁוֹם.
לג,יח וַיֹּאמַר:  הַרְאֵנִי נָא, אֶת-כְּבֹדֶךָ.	וַאֲמַר:  אַחְזִינִי כְּעַן, יָת יְקָרָךְ.
לג,יט וַיֹּאמֶר, אֲנִי אַעֲבִיר כָּל-טוּבִי עַל-פָּנֶיךָ, וְקָרָאתִי בְשֵׁם יְהוָה, לְפָנֶיךָ; וְחַנֹּתִי אֶת-אֲשֶׁר אָחֹן, וְרִחַמְתִּי אֶת-אֲשֶׁר אֲרַחֵם.	וַאֲמַר, אֲנָא אַעְבַּר כָּל טוּבִי עַל אַפָּךְ, וְאֶקְרֵי בִּשְׁמָא דַּייָ, קֳדָמָךְ; וַאֲחוּן לְמַאן דַּאֲחוּן, וַאֲרַחֵים עַל מַאן דַּאֲרַחֵים.
לג,כ וַיֹּאמֶר, לֹא תוּכַל לִרְאֹת אֶת-פָּנָי:  כִּי לֹא-יִרְאַנִי הָאָדָם, וָחָי.	וַאֲמַר, לָא תִּכּוֹל לְמִחְזֵי יָת אַפֵּי שְׁכִינְתִי:  אֲרֵי לָא יִחְזֵינַנִי אֲנָשָׁא, וְיִתְקַיַּם.
לג,כא וַיֹּאמֶר יְהוָה, הִנֵּה מָקוֹם אִתִּי; וְנִצַּבְתָּ, עַל-הַצּוּר.	וַאֲמַר יְיָ, הָא אֲתַר מְתֻקַּן קֳדָמָי; וְתִתְעַתַּד, עַל טִנָּרָא.
לג,כב וְהָיָה בַּעֲבֹר כְּבֹדִי, וְשַׂמְתִּיךָ בְּנִקְרַת הַצּוּר; וְשַׂכֹּתִי כַפִּי עָלֶיךָ, עַד-עָבְרִי.	וִיהֵי בְּמִעְבַּר יְקָרִי, וַאֲשַׁוֵּינָךְ בִּמְעָרַת טִנָּרָא; וְאַגֵּין בְּמֵימְרִי עֲלָךְ, עַד דְּאֶעְבַּר.
לג,כג וַהֲסִרֹתִי, אֶת-כַּפִּי, וְרָאִיתָ, אֶת-אֲחֹרָי; וּפָנַי, לֹא יֵרָאוּ.  {פ}	וְאֶעְדֵּי, יָת דִּבְרַת יְקָרִי, וְתִחְזֵי, יָת דְּבָתְרָי; וְדִקְדָמַי, לָא יִתַּחְזוֹן.  {פ}
לד,א וַיֹּאמֶר יְהוָה אֶל-מֹשֶׁה, פְּסָל-לְךָ שְׁנֵי-לֻחֹת אֲבָנִים כָּרִאשֹׁנִים; וְכָתַבְתִּי, עַל-הַלֻּחֹת, אֶת-הַדְּבָרִים, אֲשֶׁר הָיוּ עַל-הַלֻּחֹת הָרִאשֹׁנִים אֲשֶׁר שִׁבַּרְתָּ.	וַאֲמַר יְיָ לְמֹשֶׁה, פְּסָל לָךְ תְּרֵין לוּחֵי אַבְנַיָּא כְּקַדְמָאֵי; וְאֶכְתּוֹב, עַל לוּחַיָּא, יָת פִּתְגָמַיָּא, דַּהֲווֹ עַל לוּחַיָּא קַדְמָאֵי דְּתַבַּרְתָּא.
לד,ב וֶהְיֵה נָכוֹן, לַבֹּקֶר; וְעָלִיתָ בַבֹּקֶר אֶל-הַר סִינַי, וְנִצַּבְתָּ לִי שָׁם עַל-רֹאשׁ הָהָר.	וִהְוִי זְמִין, לְצַפְרָא; וְתִסַּק בְּצַפְרָא לְטוּרָא דְּסִינַי, וְתִתְעַתַּד קֳדָמַי תַּמָּן עַל רֵישׁ טוּרָא.
לד,ג וְאִישׁ לֹא-יַעֲלֶה עִמָּךְ, וְגַם-אִישׁ אַל-יֵרָא בְּכָל-הָהָר; גַּם-הַצֹּאן וְהַבָּקָר אַל-יִרְעוּ, אֶל-מוּל הָהָר הַהוּא.	וַאֲנָשׁ לָא יִסַּק עִמָּךְ, וְאַף אֲנָשׁ לָא יִתַּחְזֵי בְּכָל טוּרָא; אַף עָנָא וְתוֹרֵי לָא יִרְעוֹן, לָקֳבֵיל טוּרָא הַהוּא.
לד,ד וַיִּפְסֹל שְׁנֵי-לֻחֹת אֲבָנִים כָּרִאשֹׁנִים, וַיַּשְׁכֵּם מֹשֶׁה בַבֹּקֶר וַיַּעַל אֶל-הַר סִינַי, כַּאֲשֶׁר צִוָּה יְהוָה, אֹתוֹ; וַיִּקַּח בְּיָדוֹ, שְׁנֵי לֻחֹת אֲבָנִים.	וּפְסַל תְּרֵין לוּחֵי אַבְנַיָּא כְּקַדְמָאֵי, וְאַקְדֵּים מֹשֶׁה בְּצַפְרָא וּסְלֵיק לְטוּרָא דְּסִינַי, כְּמָא דְּפַקֵּיד יְיָ, יָתֵיהּ; וּנְסֵיב בִּידֵיהּ, תְּרֵין לוּחֵי אַבְנַיָּא.
לד,ה וַיֵּרֶד יְהוָה בֶּעָנָן, וַיִּתְיַצֵּב עִמּוֹ שָׁם; וַיִּקְרָא בְשֵׁם, יְהוָה.	וְאִתְגְּלִי יְיָ בַּעֲנָנָא, וְאִתְעַתַּד עִמֵּיהּ תַּמָּן; וּקְרָא בְּשְׁמָא, דַּייָ.
לד,ו וַיַּעֲבֹר יְהוָה עַל-פָּנָיו, וַיִּקְרָא, יְהוָה יְהוָה, אֵל רַחוּם וְחַנּוּן--אֶרֶךְ אַפַּיִם, וְרַב-חֶסֶד וֶאֱמֶת.	וְאַעְבַּר יְיָ שְׁכִינְתֵיהּ עַל אַפּוֹהִי, וּקְרָא, יְיָ יְיָ, אֱלָהָא רַחְמָנָא וְחַנָּנָא--מַרְחֵיק רְגַז, וּמַסְגֵּי לְמֶעֱבַד טָבְוָן וּקְשׁוֹט.
לד,ז נֹצֵר חֶסֶד לָאֲלָפִים, נֹשֵׂא עָו‍ֹן וָפֶשַׁע וְחַטָּאָה; וְנַקֵּה, לֹא יְנַקֶּה--פֹּקֵד עֲו‍ֹן אָבוֹת עַל-בָּנִים וְעַל-בְּנֵי בָנִים, עַל-שִׁלֵּשִׁים וְעַל-רִבֵּעִים.	נָטֵיר טִיבוּ לְאַלְפֵי דָּרִין, שָׁבֵיק לַעֲוָיָן וְלִמְרוֹד וּלְחוֹבִין; סָלַח לִדְתָּיְבִין לְאוֹרָיְתֵיהּ, וְלִדְלָא תָּיְבִין לָא מְזַכֵּי--מַסְעַר חוֹבֵי אֲבָהָן עַל בְּנִין וְעַל בְּנֵי בְּנִין מָרָדִין, עַל דָּר תְּלִיתַאי וְעַל דָּר רְבִיעָאי.
לד,ח וַיְמַהֵר, מֹשֶׁה; וַיִּקֹּד אַרְצָה, וַיִּשְׁתָּחוּ.	וְאוֹחִי, מֹשֶׁה; וּכְרַע עַל אַרְעָא, וּסְגֵיד.
לד,ט וַיֹּאמֶר אִם-נָא מָצָאתִי חֵן בְּעֵינֶיךָ, אֲדֹנָי, יֵלֶךְ-נָא אֲדֹנָי, בְּקִרְבֵּנוּ:  כִּי עַם-קְשֵׁה-עֹרֶף הוּא, וְסָלַחְתָּ לַעֲו‍ֹנֵנוּ וּלְחַטָּאתֵנוּ וּנְחַלְתָּנוּ.	וַאֲמַר אִם כְּעַן אַשְׁכַּחִית רַחֲמִין קֳדָמָךְ, יְיָ, תְּהָךְ כְּעַן שְׁכִינְתָא דַּייָ, בֵּינַנָא:  אֲרֵי עַם קְשֵׁי קְדָל הוּא, וְתִשְׁבּוֹק לְחוֹבַנָא וְלִחְטָאַנָא וְתַחְסְנִנַּנָא.
לד,י וַיֹּאמֶר, הִנֵּה אָנֹכִי כֹּרֵת בְּרִית, נֶגֶד כָּל-עַמְּךָ אֶעֱשֶׂה נִפְלָאֹת, אֲשֶׁר לֹא-נִבְרְאוּ בְכָל-הָאָרֶץ וּבְכָל-הַגּוֹיִם; וְרָאָה כָל-הָעָם אֲשֶׁר-אַתָּה בְקִרְבּוֹ אֶת-מַעֲשֵׂה יְהוָה, כִּי-נוֹרָא הוּא, אֲשֶׁר אֲנִי, עֹשֶׂה עִמָּךְ.	וַאֲמַר, הָא אֲנָא גָּזַר קְיָם, קֳדָם כָּל עַמָּךְ אַעֲבֵיד פְּרִישָׁן, דְּלָא אִתְבְּרִיאוּ בְּכָל אַרְעָא וּבְכָל עַמְמַיָּא; וְיִחְזֵי כָּל עַמָּא דְּאַתְּ בֵּינֵיהוֹן יָת עוּבָדָא דַּייָ, אֲרֵי דְּחִיל הוּא, דַּאֲנָא, עָבֵיד עִמָּךְ.
לד,יא שְׁמָר-לְךָ--אֵת אֲשֶׁר אָנֹכִי, מְצַוְּךָ הַיּוֹם; הִנְנִי גֹרֵשׁ מִפָּנֶיךָ, אֶת-הָאֱמֹרִי וְהַכְּנַעֲנִי, וְהַחִתִּי וְהַפְּרִזִּי, וְהַחִוִּי וְהַיְבוּסִי.	טַר לָךְ--יָת דַּאֲנָא, מְפַקְּדָךְ יוֹמָא דֵּין; הָאֲנָא מְתָרֵיךְ מִן קֳדָמָךְ, יָת אֱמוֹרָאֵי וּכְנַעֲנָאֵי, וְחִתָּאֵי וּפְרִזָּאֵי, וְחִוָּאֵי וִיבוּסָאֵי.
לד,יב הִשָּׁמֶר לְךָ, פֶּן-תִּכְרֹת בְּרִית לְיוֹשֵׁב הָאָרֶץ, אֲשֶׁר אַתָּה, בָּא עָלֶיהָ:  פֶּן-יִהְיֶה לְמוֹקֵשׁ, בְּקִרְבֶּךָ.	אִסְתְּמַר לָךְ, דִּלְמָא תִּגְזַר קְיָם לְיָתֵיב אַרְעָא, דְּאַתְּ, עָלֵיל עֲלַהּ:  דִּלְמָא יְהֵי לְתַקְלָא, בֵּינָךְ.
לד,יג כִּי אֶת-מִזְבְּחֹתָם תִּתֹּצוּן, וְאֶת-מַצֵּבֹתָם תְּשַׁבֵּרוּן; וְאֶת-אֲשֵׁרָיו, תִּכְרֹתוּן.	אֲרֵי יָת אֵיגוֹרֵיהוֹן תְּתָרְעוּן, וְיָת קָמָתְהוֹן תְּתַבְּרוּן; וְיָת אֲשֵׁירֵיהוֹן, תְּקָצְצוּן.
לד,יד כִּי לֹא תִשְׁתַּחֲוֶה, לְאֵל אַחֵר:  כִּי יְהוָה קַנָּא שְׁמוֹ, אֵל קַנָּא הוּא.	אֲרֵי לָא תִּסְגּוֹד, לְטָעֲוָת עַמְמַיָּא:  אֲרֵי יְיָ קַנָּא שְׁמֵיהּ, אֵל קַנָּא הוּא.
לד,טו פֶּן-תִּכְרֹת בְּרִית, לְיוֹשֵׁב הָאָרֶץ; וְזָנוּ אַחֲרֵי אֱלֹהֵיהֶם, וְזָבְחוּ לֵאלֹהֵיהֶם, וְקָרָא לְךָ, וְאָכַלְתָּ מִזִּבְחוֹ.	דִּלְמָא תִּגְזַר קְיָם, לְיָתֵיב אַרְעָא; וְיִטְעוֹן בָּתַר טָעֲוָתְהוֹן, וִידַבְּחוּן לְטָעֲוָתְהוֹן, וְיִקְרוֹן לָךְ, וְתֵיכוֹל מִדִּבְחֵיהוֹן.
לד,טז וְלָקַחְתָּ מִבְּנֹתָיו, לְבָנֶיךָ; וְזָנוּ בְנֹתָיו, אַחֲרֵי אֱלֹהֵיהֶן, וְהִזְנוּ אֶת-בָּנֶיךָ, אַחֲרֵי אֱלֹהֵיהֶן.	וְתִסַּב מִבְּנָתְהוֹן, לִבְנָךְ; וְיִטְעוֹן בְּנָתְהוֹן, בָּתַר טָעֲוָתְהוֹן, וְיַטְעֲיָן יָת בְּנָךְ, בָּתַר טָעֲוָתְהוֹן.
לד,יז אֱלֹהֵי מַסֵּכָה, לֹא תַעֲשֶׂה-לָּךְ.	דַּחְלָן דְּמַתְּכָא, לָא תַּעֲבֵיד לָךְ.
לד,יח אֶת-חַג הַמַּצּוֹת, תִּשְׁמֹר--שִׁבְעַת יָמִים תֹּאכַל מַצּוֹת אֲשֶׁר צִוִּיתִךָ, לְמוֹעֵד חֹדֶשׁ הָאָבִיב:  כִּי בְּחֹדֶשׁ הָאָבִיב, יָצָאתָ מִמִּצְרָיִם.	יָת חַגָּא דְּפַטִּירַיָּא, תִּטַּר--שִׁבְעָא יוֹמִין תֵּיכוֹל פַּטִּירָא דְּפַקֵּידְתָּךְ, לִזְמַן יַרְחָא דַּאֲבִיבָא:  אֲרֵי בְּיַרְחָא דַּאֲבִיבָא, נְפַקְתָּא מִמִּצְרָיִם.
לד,יט כָּל-פֶּטֶר רֶחֶם, לִי; וְכָל-מִקְנְךָ תִּזָּכָר, פֶּטֶר שׁוֹר וָשֶׂה.	כָּל פָּתַח וַלְדָּא, דִּילִי הוּא; וְכָל בְּעִירָךְ דִּכְרִין תַּקְדֵּישׁ, בְּכוֹר תּוֹר וְאִמַּר.
לד,כ וּפֶטֶר חֲמוֹר תִּפְדֶּה בְשֶׂה, וְאִם-לֹא תִפְדֶּה וַעֲרַפְתּוֹ; כֹּל בְּכוֹר בָּנֶיךָ תִּפְדֶּה, וְלֹא-יֵרָאוּ פָנַי רֵיקָם.	וּבֻכְרָא דִּחְמָרָא תִּפְרוּק בְּאִמְּרָא, וְאִם לָא תִּפְרוּק וְתִקְפֵיהּ; כֹּל בֻּכְרָא דִּבְנָךְ תִּפְרוּק, וְלָא יִתַּחְזוֹן קֳדָמַי רֵיקָנִין.
לד,כא שֵׁשֶׁת יָמִים תַּעֲבֹד, וּבַיּוֹם הַשְּׁבִיעִי תִּשְׁבֹּת; בֶּחָרִישׁ וּבַקָּצִיר, תִּשְׁבֹּת.	שִׁתָּא יוֹמִין תִּפְלַח, וּבְיוֹמָא שְׁבִיעָאָה תְּנוּחַ; בִּזְרוּעָא וּבִחְצָדָא, תְּנוּחַ.
לד,כב וְחַג שָׁבֻעֹת תַּעֲשֶׂה לְךָ, בִּכּוּרֵי קְצִיר חִטִּים; וְחַג, הָאָסִיף--תְּקוּפַת, הַשָּׁנָה.	וְחַגָּא דְּשָׁבוּעַיָּא תַּעֲבֵיד לָךְ, בִּכּוּרֵי חֲצָד חִטִּין; וְחַגָּא, דִּכְנָשָׁא--בְּמִפְּקַהּ, דְּשַׁתָּא.
לד,כג שָׁלֹשׁ פְּעָמִים, בַּשָּׁנָה--יֵרָאֶה, כָּל-זְכוּרְךָ, אֶת-פְּנֵי הָאָדֹן יְהוָה, אֱלֹהֵי יִשְׂרָאֵל.	תְּלָת זִמְנִין, בְּשַׁתָּא--יִתַּחְזוֹן, כָּל דְּכוּרָךְ, קֳדָם רִבּוֹן עָלְמָא יְיָ, אֱלָהָא דְּיִשְׂרָאֵל.
לד,כד כִּי-אוֹרִישׁ גּוֹיִם מִפָּנֶיךָ, וְהִרְחַבְתִּי אֶת-גְּבֻלֶךָ; וְלֹא-יַחְמֹד אִישׁ, אֶת-אַרְצְךָ, בַּעֲלֹתְךָ לֵרָאוֹת אֶת-פְּנֵי יְהוָה אֱלֹהֶיךָ, שָׁלֹשׁ פְּעָמִים בַּשָּׁנָה.	אֲרֵי אֲתָרֵיךְ עַמְמִין מִן קֳדָמָךְ, וְאַפְתֵּי יָת תְּחוּמָךְ; וְלָא יְחַמֵּיד אֲנָשׁ, יָת אַרְעָךְ, בְּמִסְּקָךְ לְאִתַּחְזָאָה קֳדָם יְיָ אֱלָהָךְ, תְּלָת זִמְנִין בְּשַׁתָּא.
לד,כה לֹא-תִשְׁחַט עַל-חָמֵץ, דַּם-זִבְחִי; וְלֹא-יָלִין לַבֹּקֶר, זֶבַח חַג הַפָּסַח.	לָא תִּכּוֹס עַל חֲמִיעַ, דַּם פִּסְחִי; וְלָא יְבִיתוּן לְצַפְרָא, תַּרְבֵּי נִכְסַת חַגָּא דְּפִסְחָא.
לד,כו רֵאשִׁית, בִּכּוּרֵי אַדְמָתְךָ, תָּבִיא, בֵּית יְהוָה אֱלֹהֶיךָ; לֹא-תְבַשֵּׁל גְּדִי, בַּחֲלֵב אִמּוֹ.  {פ}	רֵישׁ, בִּכּוּרֵי אַרְעָךְ, תַּיְתֵי, לְבֵית מַקְדְּשָׁא דַּייָ אֱלָהָךְ; לָא תֵּיכְלוּן בְּסַר, בַּחֲלַב.  {פ}
לד,כז וַיֹּאמֶר יְהוָה אֶל-מֹשֶׁה, כְּתָב-לְךָ אֶת-הַדְּבָרִים הָאֵלֶּה:  כִּי עַל-פִּי הַדְּבָרִים הָאֵלֶּה, כָּרַתִּי אִתְּךָ בְּרִית--וְאֶת-יִשְׂרָאֵל.	וַאֲמַר יְיָ לְמֹשֶׁה, כְּתוֹב לָךְ יָת פִּתְגָמַיָּא הָאִלֵּין:  אֲרֵי עַל מֵימַר פִּתְגָמַיָּא הָאִלֵּין, גְּזַרִית עִמָּךְ קְיָם--וְעִם יִשְׂרָאֵל.
לד,כח וַיְהִי-שָׁם עִם-יְהוָה, אַרְבָּעִים יוֹם וְאַרְבָּעִים לַיְלָה--לֶחֶם לֹא אָכַל, וּמַיִם לֹא שָׁתָה; וַיִּכְתֹּב עַל-הַלֻּחֹת, אֵת דִּבְרֵי הַבְּרִית--עֲשֶׂרֶת, הַדְּבָרִים.	וַהֲוָה תַּמָּן קֳדָם יְיָ, אַרְבְּעִין יְמָמִין וְאַרְבְּעִין לֵילָוָן--לַחְמָא לָא אֲכַל, וּמַיָּא לָא שְׁתִי; וּכְתַב עַל לוּחַיָּא, יָת פִּתְגָמֵי קְיָמָא--עַסְרָא, פִּתְגָמִין.
לד,כט וַיְהִי, בְּרֶדֶת מֹשֶׁה מֵהַר סִינַי, וּשְׁנֵי לֻחֹת הָעֵדֻת בְּיַד-מֹשֶׁה, בְּרִדְתּוֹ מִן-הָהָר; וּמֹשֶׁה לֹא-יָדַע, כִּי קָרַן עוֹר פָּנָיו--בְּדַבְּרוֹ אִתּוֹ.	וַהֲוָה, כַּד נְחַת מֹשֶׁה מִטּוּרָא דְּסִינַי, וּתְרֵין לוּחֵי דְּסָהֲדוּתָא בִּידָא דְּמֹשֶׁה, בְּמֵיחֲתֵיהּ מִן טוּרָא; וּמֹשֶׁה לָא יְדַע, אֲרֵי סְגִי זִיו יְקָרָא דְּאַפּוֹהִי--בְּמַלָּלוּתֵיהּ עִמֵּיהּ.
לד,ל וַיַּרְא אַהֲרֹן וְכָל-בְּנֵי יִשְׂרָאֵל, אֶת-מֹשֶׁה, וְהִנֵּה קָרַן, עוֹר פָּנָיו; וַיִּירְאוּ, מִגֶּשֶׁת אֵלָיו.	וַחֲזָא אַהֲרוֹן וְכָל בְּנֵי יִשְׂרָאֵל, יָת מֹשֶׁה, וְהָא סְגִי, זִיו יְקָרָא דְּאַפּוֹהִי; וּדְחִילוּ, מִלְּאִתְקָרָבָא לְוָתֵיהּ.
לד,לא וַיִּקְרָא אֲלֵהֶם מֹשֶׁה, וַיָּשֻׁבוּ אֵלָיו אַהֲרֹן וְכָל-הַנְּשִׂאִים בָּעֵדָה; וַיְדַבֵּר מֹשֶׁה, אֲלֵהֶם.	וּקְרָא לְהוֹן מֹשֶׁה, וְתָבוּ לְוָתֵיהּ אַהֲרוֹן וְכָל רַבְרְבַיָּא בִּכְנִשְׁתָּא; וּמַלֵּיל מֹשֶׁה, עִמְּהוֹן.
לד,לב וְאַחֲרֵי-כֵן נִגְּשׁוּ, כָּל-בְּנֵי יִשְׂרָאֵל; וַיְצַוֵּם--אֵת כָּל-אֲשֶׁר דִּבֶּר יְהוָה אִתּוֹ, בְּהַר סִינָי.	וּבָתַר כֵּין אִתְקָרַבוּ, כָּל בְּנֵי יִשְׂרָאֵל; וּפַקֵּידִנּוּן--יָת כָּל דְּמַלֵּיל יְיָ עִמֵּיהּ, בְּטוּרָא דְּסִינָי.
לד,לג וַיְכַל מֹשֶׁה, מִדַּבֵּר אִתָּם; וַיִּתֵּן עַל-פָּנָיו, מַסְוֶה.	וְשֵׁיצֵי מֹשֶׁה, מִלְּמַלָּלָא עִמְּהוֹן; וִיהַב עַל אַפּוֹהִי, בֵּית אַפֵּי.
לד,לד וּבְבֹא מֹשֶׁה לִפְנֵי יְהוָה, לְדַבֵּר אִתּוֹ, יָסִיר אֶת-הַמַּסְוֶה, עַד-צֵאתוֹ; וְיָצָא, וְדִבֶּר אֶל-בְּנֵי יִשְׂרָאֵל, אֵת, אֲשֶׁר יְצֻוֶּה.	וְכַד עָלֵיל מֹשֶׁה לִקְדָם יְיָ, לְמַלָּלָא עִמֵּיהּ, מַעְדֵּי יָת בֵּית אַפֵּי, עַד מִפְּקֵיהּ; וְנָפֵיק, וּמְמַלֵּיל עִם בְּנֵי יִשְׂרָאֵל, יָת, דְּמִתְפַּקַּד.
לד,לה וְרָאוּ בְנֵי-יִשְׂרָאֵל, אֶת-פְּנֵי מֹשֶׁה, כִּי קָרַן, עוֹר פְּנֵי מֹשֶׁה; וְהֵשִׁיב מֹשֶׁה אֶת-הַמַּסְוֶה עַל-פָּנָיו, עַד-בֹּאוֹ לְדַבֵּר אִתּוֹ.  {ס}	וְחָזַן בְּנֵי יִשְׂרָאֵל, יָת אַפֵּי מֹשֶׁה, אֲרֵי סְגִי, זִיו יְקָרָא דְּאַפֵּי מֹשֶׁה; וּמְתִיב מֹשֶׁה יָת בֵּית אַפֵּי עַל אַפּוֹהִי, עַד דְּעָלֵיל לְמַלָּלָא עִמֵּיהּ.  {ס}